ගණේමුල්ල සංජීව ඝාතනයේ සැකකරුවන් තවදුරටත් රිමාන්ඩ්
ප්‍රබල පාතාල කල්ලි නායකයෙකු බව කියන ගනේමුල්ල සංජීව ඝාතන සිද්ධිය සම්බන්ධයෙන් රිමාන්ඩ් භාරයේ පසුවන එහි වෙඩික්කරු ඇතුළු සැකකරුවන් පිරිසක් තවදුරටත් ලබන 05 වනදා දක්වා රක්ෂිත බන්ධනාගාර ගත කරන ලෙස කොළඹ මහේස්ත්‍රාත් අධිකරණය නියම කළේය.
එම පැමිණිල්ල අද (21) කොළඹ ප්‍රධාන මහේස්ත්‍රාත් අසංග එස් බෝදරගම මහතා ඉදිරියේ කැඳවනු ලැබීය.
එම අවස්ථාවේදී බූස්ස බන්ධනාගාරයේ රඳවා සිටින එම සැකකරුවන් පිරිස සූම් තාක්ෂණය ඔස්සේ අධිකරණයට ඉදිරිපත් කර තිබුණි.
එහිදී කොළඹ අපරාධ කොට්ඨාශයේ නිලධාරින් විසින් මෙතෙක් සිදුකළ විමර්ශන පිළිබඳ වාර්තාවක් අධිකරණයට ඉදිරිපත් කළේය.
මේ වන විට වෙනත් සිද්ධියක් සම්බන්ධයෙන් රිමාන්ඞ් භාරයෙන් පසු වන සුපුන් ප්‍රදීප් කුමාර නමැති සැකකරු මෙම නඩුකරයේ 35 වන සැකකරු ලෙස නම් කිරීමට අවසර දෙන ලෙස එම නිලධාරියා අධිකරණයෙන් ඉල්ලා සිටියේය.
එම ඉල්ලීමට ඉඩ දුන් මහේස්ත්‍රාත්වරයා සැකකරු මීළඟ දින අධිකරණයට ඉදිරිපත් කරන ලෙස බන්ධනාගාර නිලධාරීන්ට නියම කළේය.
වැඩිදුරටත් කරුණු දැක්වූ කොළඹ අපරාධ කොට්ඨාශයේ නිලධාරියා මෙම සිද්ධිය සම්බන්ධයෙන් රිමාන්ඩ් භාරයෙන් පසු වන සැකකරුවන් දෙදෙනෙකගෙන් ලබා ගත් ප්‍රකාශ මත වැඩිදුර විමර්ශන සිදු කරන බව පැවසීය.
මෙම සිද්ධිය සම්බන්ධයෙන් මෙවන විට රිමාන්ඩ් භාරයේ පසුවන තවත් සැකකරුවකුගෙන් ප්‍රකාශ සටහන් කර ගැනීමට අවශ්‍යව තිබෙන බවත් ඒ සඳහා අවසර ලබා දෙන්න ලෙසත් ඔහු අධිකරණයෙන් ඉල්ලා සිටි අතර එම ඉල්ලීමටද මහේස්ත්‍රාත්වරයා අවසර ලබා දුන්නේය.
වැඩිදුරටත් කරුණු දැක්වූ කොළඹ අපරාධ කොට්ඨාශයේ නිලධාරියා මෙම සිද්ධිය සම්බන්ධයෙන් අත්අඩංගුවට ගෙන මේවන විට අපරාධ පරීක්ෂණ දෙපාර්තමේන්තුවේ රඳවාගෙන ප්‍රශ්න කරන කෙහෙල්බද්දර පද්මේ ඇතුළු සැකකරුවන් තුන්දෙනෙකුගේ රැඳවුම් නියෝගවලට අදාළ පිටපත් අධිකරණයට ඉදිරිපත් කර තිබෙන බවත් දැනුම් දුන්නේය.
ඒ අනුව මෙම සිද්ධියට අදාළ විමර්ශන සිදුකර ප්‍රගතිය වාර්තා කිරීම සඳහා දිනයක් ලබා දෙන ලෙසත් එතෙක් සැකකරුවන් රක්ෂිත බන්ධනාගාර ගත කරන ලෙස ඔහු අධිකරණයෙන් ඉල්ලා සිටියේය.
ඉදිරිපත් වූ කරුණු සලකා බැලූ මහේස්ත්‍රාත්වරයා මෙම සැකකරුවන් දෙසැම්බර් මස 05 වනදා දක්වා තවදුරටත් රිමාන්ඩ් භාරයේ තැබීමට නියම කළ අතර එදින පරීක්‍ෂණවල ප්‍රගතිය වාර්තා කරන ලෙස කොළඹ අපරාධ කොට්ඨාශයට නියම කළේය.