“කෙහෙල්බද්දර පද්මේ” ඇතුළු පස්දෙනා රැගත් ගුවන් යානය ශ්‍රී ලංකාව බලා පිටත් වෙයි
සංවිධානාත්මක අපරාධ කල්ලි නායක “කෙහෙල්බද්දර පද්මේ” ඇතුළු පාතාල කල්ලි සාමාජිකයන් 5 දෙනෙකු රැගත් ගුවන් යානය කටුනායක බණ්ඩාරනායක ගුවන්තොටුපොළ වෙත ළඟා වෙමින් සිටින බව මහජන ආරක්ෂක අමාත්‍ය ආනන්ද විජේපාල අද (30) පවසනවා.
මෙම පිරිස ඉන්දුනීසියාවේ ජකර්තා නුවර සිට පිටත් වූ බවත්, ඔවුන් මෙරටට ගෙන ඒම සඳහා ඉන්දුනීසියානු රජයේ සහය ලැබුණු බවත් අමාත්‍යවරයා වැඩිදුරටත් සඳහන් කළා.
ඉන්දුනීසියාවේදී අත්අඩංගුවටගත් කෙහෙල්බද්දර පද්මේ , කමාන්ඩෝ සලින්ද නොහොත් පිට්ටුවා, පානදුරේ නිලංග , බැකෝ සමන් සහ තැඹිලි ලහිරු යන පාතාලයේ අපරාධකරුවන් පස්දෙනා රැගත් ගුවන් යානය අද (30) පස්වරුවේ කටුනායක බණ්ඩාරනායක ජාත්‍යන්තර ගුවන් තොටුපළ වෙත ළඟාවීමට නියමිතයි.
ඉන්දුනීසියාවට ගොස් සිටින බස්නාහිර පළාත් උතුරු දිසා අපරාධ කොට්ඨාසයේ අධ්‍යක්ෂ සහකාර පොලිස් අධිකාරි රෝහන් ඕලුගල සහ අපරාධ පරීක්‍ෂණදෙපාර්තමේන්තුවේ සහකාර පොලිස් අධිකාරීවරයාගේ අධීක්ෂණයෙන් ඉන්දුනීසියානු පොලිසියේ කණ්ඩායමක් මෙම පාතාල අපරාධකරුවන් රැගෙන පැමිණීමට නියමිතයි.
අපරාධ පරික්ෂණ දෙපාර්තමේන්තුවේත් පොලිස් විශේෂ කාර්ය බලකායේ කණ්ඩායම් මේ වනවිට ගුවන් තොටුපල පරිශ්‍රයේත් ඉන් පිටතත් රැඳී සිටිමින් ආරක්ෂාව තර කර තිබෙන බවයි වාර්තා වන්නේ.
කෙහෙල්බද්දර පද්මේ ප්‍රමුඛ සංවිධානාත්මක අපරාධ කල්ලි තුනක නායකයින් ඇතුළු 06 දෙනෙකු ඉන්දුනීසියාවේදී අත්අඩංගුවට ගැනීමට පොලීසිය පෙරේදා (28) සමත් වුණා.
ඒ , ශ්‍රී ලංකා පොලීසිය, ඉන්දුනීසියානු පොලීසිය සහ ජාත්‍යන්තර පොලීසිය සිදුකළ ඒකාබද්ධ ජාත්‍යන්තර මෙහෙයුමකින්.