කට්ටි පැන්න රාජිත අද අධිකරණයට
අධිකරණය හමුවේ පෙනී සිටින ලෙස දන්වා නිකුත් කළ නොතීසියට අනුව හිටපු අමාත්‍ය රාජිත සේනාරත්න අද කොළඹ මහේස්ත්‍රාත් අධිකරණය හමුවේ පෙනී සිටීමට නියමිතව තිබෙනවා.
සිය සේවාදායකයා අද අනිවාර්යයෙන්ම අධිකරණය හමුවේ පෙනී සිටින බව හිටපු අමාත්‍ය රාජිත සේනාරත්නගේ නීතිඥයින් කොළඹ මහාධිකරණයට ඊයේ දැනුම් දුන්නා.
ඒ අනුව සිය සේවාදායකයා අත්අඩංගුවට ගැනීමට කොළඹ මහේස්ත්‍රාත් අධිකරණය නිකුත් කර තිබෙන වරෙන්තුව තාවකාලිකව අත්හිටුවීමේ අතුරු තහනම් නියෝගයක් නිකුත් කරන ලෙසයි අමාත්‍යවරයාගේ නීතිඥයින් අධිකරණයෙන් ඉල්ලා සිටියේ.
හිටපු අමාත්‍යවරයා ඉදිරිපත් කළ ප්‍රතිශෝධන පෙත්සම විභාගයට ගැනීමට තීරණය කළ කොළඹ මහාධිකරණය, එහි වග උත්තරකරුවන් ලෙස නම් කර ඇති අල්ලස් කොමිසමේ අධ්‍යක්ෂ ජනරාල් ඇතුළු නිලධාරීන්ට නොතීසි නිකුත් කළා.
එහිදී පෙත්සම්කාර රාජිත සේනාරත්න වෙනුවෙන් පෙනී සිටි ජනාධිපති නීතිඥ කාලිංග ඉන්දතිස්ස පැවසුවේ, ධීවර වරාය නීතිගත සංස්ථාවේ තිබූ වැලිගොව්වා නමැති නෞකාව අවභාවිත කළ බවට චෝදනා කරමින් 2013 වසරේ ලැබුණු නිර්නාමික පැමිණිල්ලකට අනුව අල්ලස් කොමිසම විමර්ශනයක් ආරම්භ කර ඇති බවයි.
ඉකුත් මස 02 වැනිදා මෙම විමර්ශනයට අදාළව ප්‍රකාශයක් ලබාදෙන ලෙස අල්ලස් කොමිසම ලිපියක් මගින් හිටපු අමාත්‍යවරයාට දැනුම් දී තිබුණා.
උණ රෝගී තත්වයක් හේතුවෙන් එදින පෙනී සිටිමට නොහැකි සිය සේවාදායකයා අල්ලස් කොමිසම වෙත වෛද්‍ය වාර්තා ඉදිරිපත් කිරීමට කටයුතු කළ බවයි ජනාධිපති නීතිඥවරයා ප්‍රකාශ කළේ.
ඉන්පසු සැකකරු ඇප අයැදුමක් කොළඹ මහේස්ත්‍රාත් අධිකරණය හමුවේ ගොනු කළ අතර එය අධිකරණය විසින් ප්‍රතික්ෂේප කළ බවද ඔහු කියා සිටියා.
කෙසේ වෙතත් පසුගිය 12 වැනිදා අල්ලස් කොමිසම සිය සේවාදායකයා අත්අඩංගුවට ගැනීම සඳහා කොළඹ මහේස්ත්‍රාත් අධිකරණය විසින් වරෙන්තු නිකුත් කර තිබෙන අතර එම වරෙන්තුව මහේස්ත්‍රාත්වරයා විසින් නිකුත් කර තිබෙන ආකාරය නීතියට පටහැනි බවයි ජනාධිපති නීතිඥ කාලිංග ඉන්දතිස්ස ප්‍රකාශ කළේ.
අපරාධ නඩු විධාන සංග්‍රහයට අනුව මෙවැනි වරෙන්තුවක් ලබා ගැනීමට පෙර සාක්ෂි මෙහෙයවීම අත්‍යවශ්‍ය බව පෙන්වා දුන් ජනාධිපති නීතිඥවරයා, සිය සේවාදායකයාට එරෙහිව කොළඹ අතිරේක මහේස්ත්‍රාත්වරයා විසින් මෙම වරෙන්තුව නිකුත් කර තිබෙන්නේ නීතියේ සඳහන් කර ඇති ආකාරයට සාක්ෂි මෙහෙයවීමකින් තොරව බවත් කියා සිටියා.
ඉදිරිපත් වූ කරුණු සලකා බැලූ මහාධිකරණ විනිසුරුවරිය මෙම පෙත්සමට අදාලව නොතිසි පමණක් නිකුත් කරන බව සඳහන් කළ අතර නඩුව සැප්තැම්බර් 10 වැනිදා කැඳවීමටද නියම වුණා.