භූමිතෙල් ප්‍රශ්නය දින දෙකකින් අවසන්
භූමිතෙල් බෙදා හැරීමේ දී පවතින ප්‍රමාදය ඉදිරි දින දෙක තුළ සම්පූර්ණයෙන්ම අවසන් කිරීමට රජය විසින් පියවර ගෙන තිබෙන බව ජනාධිපති මාධ්‍ය අංශය දැනුම් දෙනවා.
මේ සම්බන්ධයෙන් අදහස් දක්වමින් ප්‍රජා කටයුතු පිළිබඳ ජනාධිපති අධ්‍යක්ෂ ජෙනරාල් කීර්ති තෙන්නකෝන් පවසන්නේ, ධීවර ප්‍රජාවගේ ඉන්ධන අවශ්‍යතාවය වෙනුවෙන් අද (23) දිනය තුළ භුමිතෙල් බවුසර් 74 ක් නිකුත් කිරීමට කටයුතු කර ඇති අතර පෞද්ගලික අංශයේ පිරවුම්හල් 49 ක්, සමූපකාර පිරවුම්හල 18 ක් සහ වෙනත් පිරවුම්හල් 07කින් ඔවුන් වෙත අඛණ්ඩව භුමිතෙල් බෙදාහැරීම සිදු කරන බවයි.
අනුමැතිය ලබා දී ඇති නමුත් මුදල් නොගෙවීම හේතුවෙන් ඊයේ (22) දිනයේ භුමිතෙල් නිකුත් කර නැති සියලු ම පිරවුම්හල් වෙත අද (23) දිනයේ දී භුමිතෙල් නිකුත් කිරීමට ද උපදෙස් දී ඇති බව ජනාධිපති අධ්‍යක්ෂ ජෙනරාල්වරයා පවසනවා.
තවද මේ දක්වා භුමිතෙල් බෙදීම සිදු නොකළ සමූපකාර පිරවුම්හල් 18ක් මගින් ද භුමිතෙල් නිකුත් කිරීමට කටයුතු කර ඇති අතර පළාත් සමූපකාර කොමසාරිස්වරුන් හා ලේකම්වරුන්ගේ නිර්දේශ මත අවශ්‍ය මූල්‍ය පහසුකම් සමූපකාර ග්‍රාමීය බැංකු මගින් ලබා දී ඇති බවත් ඔහු පවසනවා.
ධීවර ප්‍රජාව වෙත ඉන්ධන බෙදා හැරීම පිළිබඳ අධීක්ෂණය හා මෙහෙයවීම ඊයේ (22) සිට පළාත් ප්‍රධාන ලේකම්වරු සහ දිසාපතිවරු වෙත පවරා ඇති බවත්, ඒ අනුව හෙට( 24) වන විට ධීවරයින් වෙත භුමිතෙල් සැපයීම සම්පූර්ණයෙන්ම යථා තත්ත්වයට පත්වනු ඇති බවටත් කීර්ති තෙන්නකෝන් විශ්වාසය පළ කරන බව ජනාධිපති මාධ්‍ය ඒකකය දැනුම්වත් කරනවා.
කෙසේ නමුත් වත්තල හැඳල, බේරුවල (ධිවර වරාය), හැඳළ විජේසිංහ, ගාල්ල, අහුන්ගල්ල, තංගල්ල, නොරොච්චෝල, පුත්තලම, හලාවත වැල්ල, හලාවත අලුත්වත්ත, වැල්වැටිතුරේ, පුදුකුඩුඉරිප්පු, කයිට්ස්, ගුරුනගර්, තලයාඩි, මයිලෙඩ්ඩි, කලවංචිකුඩි ඇතුළු ස්ථාන රැසකට භුමිතෙල් බවුසර් තොග 28ක් ඊයේ (22) දිනයේ දී නිකුත් කර තිබෙනවා.
මීට අමතරව ධීවර දෙපාර්තමේන්තුව විසින් ක්‍රියාත්මක කරන ධීවර වරාය 14ක ද භුමිතෙල් හා ඩීසල් ඉන්ධන ධීවරයින් වෙත නිකුත් කිරීම අඛණ්ඩව සිදු කෙරෙන බවයි ජනාධිපති මාධ්‍ය ඒකකය නිවේදනය කරන්නේ.
එසේ ම ධීවරයින්ගේ අවශ්‍යතා සඳහා ඉන්ධන සැපයීමේ වගකීම නොවැම්බර් 22 වන දින සිට දකුණ, බස්නාහිර, වයඹ, උතුර සහ නැගෙනහිර පළාත් ප්‍රධාන ලේකම්වරුන් සහ දිස්ත්‍රික් ලේකම්වරුන්ගේ සෘජු අධීක්ෂණය යටතේ සිදු කෙරෙන අතර ගාල්ල, මාතර, හම්බන්තොට, කළුතර, කොළඹ, ගම්පහ, පුත්තලම, යාපනය, මන්නාරම, කිලිනොච්චි, මුලතීව්, ත්‍රිකුණාමය, මඩකළපුව සහ අම්පාර දිසාපතිවරුන් මගින් ද, ධීවර දෙපාර්තමේන්තුව මගින් ද ධීවරයින්ගේ ඉන්ධන අවශ්‍යතා විමසා බලනු ලැබෙන බවයි ජනාධිපති මාධ්‍ය ඒකකය වැඩිදුරටත් සඳහන් කරන්නේ